انڈونیشیا کے وزیر خارجہ سگیونو کا دہلی میں ہوا شاندار استقبال، ہندوستان-انڈونیشیا جوائنٹ کمیشن میٹنگ میں ہوں گے شامل

انڈونیشیا کے وزیر خارجہ سگیونو اتوار (7 جون) کی صبح آٹھویں ہندوستان-انڈونیشیا جوائنٹ کمیشن میٹنگ میں شرکت کے لیے نئی دہلی پہنچے۔ وزارت خارجہ نے ان کا گرمجوشی سے استقبال کرتے ہوئے کہا کہ ’’وزیر خارجہ سگیونو اور وزیر خارجہ ڈاکٹر ایس جے شنکر آٹھویں ہندوستان-انڈونیشیا جوائنٹ کمیشن میٹنگ کی مشترکہ صدارت کریں گے۔ دونوں وزراء ہمارے ممالک کے درمیان مضبوط جامع اسٹریٹجک شراکت داری کا جائزہ لیں گے اور دو فریقی تعاون کو مزید مضبوط بنانے کے طریقوں پر تبادلہ خیال کریں گے۔‘‘

واضح رہے کہ یہ آٹھویں ہندوستان-انڈونیشیا مشترکہ کمیشن میٹنگ دونوں ممالک کو باہمی تعاون کی پیش رفت کا جائزہ لینے کے لیے ایک اہم پلیٹ فارم فراہم کرے گی۔ جنوری 2001 میں ایک مفاہمت کی یادداشت (ایم او یو) پر دستخط ہونے کے بعد دونوں ممالک کے وزرائے خارجہ کی سطح پر مشترکہ کمیشن کے نظام کا قیام عمل میں لایا گیا تھا۔ اس سے قبل ساتویں مشترکہ کمیشن میٹنگ 17 جون 2022 کو نئی دہلی میں منعقد ہوئی تھی۔ بالی میں واقع ہندوستانی قونصل خانے کے مطابق اس میٹنگ کی مشترکہ صدارت وزیر خارجہ ایس جے شنکر اور انڈونیشیا کی اس وقت کی وزیر خارجہ ریٹنو مارسوڈی نے کی تھی۔

اس سے قبل 14 مئی کو وزیر خارجہ ایس جے شنکر نے انڈونیشیا کے وزیر خارجہ سگیونو سے ملاقات کی تھی۔ دونوں لیڈران نے ہندوستان-انڈونیشیا جامع اسٹریٹجک شراکت داری اور ’آسیان‘ کے ساتھ تعاون کی پیش رفت کا جائزہ لیا تھا۔ یہ ملاقات ’برکس‘ ممالک کے وزرائے خارجہ کے اجلاس کے دوران ہوئی تھی۔ وزیر خارجہ جے شنکر نے اس اجلاس کی صدارت کی تھی۔ سوشل میڈیا پلیٹ فارم ’ایکس‘ پر ایس جے شنکر نے لکھا تھا کہ ’’انڈونیشیا کے وزیر خارجہ سگیونو کا خیرمقدم کرتے ہوئے خوشی ہوئی۔ ہم نے اپنی جامع اسٹریٹجک شراکت داری کی پیش رفت اور آسیان کے ساتھ تعاون کا جائزہ لیا۔‘‘

جنوری 2025 میں انڈونیشیا کے صدر پرابوو سوبیانتو ہندوستان کے سرکاری دورے پر نئی دہلی آئے تھے۔ اس دوران انہوں نے ہندوستان کی 76ویں یوم جمہوریہ کی تقریب میں مہمان خصوصی کے طور پر بھی شرکت کی تھی۔ یہ موقع ہندوستان اور انڈونیشیا کے درمیان سفارتی تعلقات کی 75ویں سالگرہ کے ساتھ بھی ہم آہنگ تھا۔ قابل ذکر ہے کہ دونوں ممالک نے 2018 میں وزیر اعظم نریندر مودی کے جکارتہ دورہ کے دوران اپنے تعلقات کو جامع اسٹریٹجک شراکت داری کے درجے تک بڑھایا تھا۔ دونوں ممالک نے ہندوستان اور انڈونیشیا کے درمیان ہند-بحر الکاہل خطے میں سمندری تعاون پر مشترکہ نقطۂ نظر کو بھی اپنایا تھا، جس سے خاص طور پر دفاعی شعبے میں دونوں ممالک کے تعلقات مزید مضبوط ہوئے ہیں۔