ایس جی پی سی کا رام رحیم کو ملی پیرول پر اعتراض، حکومت پر دوہرے معیار اپنانے کا الزام

چنڈی گڑھ: روہتک کی سناریا جیل میں سزا کاٹ رہے ڈیرہ سچا سودا سربراہ گرمیت رام رحیم کو ایک بار پھر 30 دن کی پیرول ملنے پر شرومنی گردوارہ پربندھک کمیٹی (ایس جی پی سی) نے سخت ناراضگی ظاہر کی ہے۔ تنظیم نے ہریانہ حکومت اور مرکزی حکومت پر دوہرے معیار اپنانے کا الزام لگاتے ہوئے اس فیصلے پر سنگین سوال کھڑے کیے ہیں۔

ایس جی پی سی کے رکن اور سینئر وکیل بھگونت سنگھ سیالکا نے میڈیا سے گفتگو کے دوران کہا کہ دو سادھویوں کے ساتھ عصمت دری کے معاملے میں سزا یافتہ گرمیت رام رحیم کو گزشتہ نو برسوں میں متعدد بار جیل سے باہر آنے کی اجازت دی جا چکی ہے، جس سے حکومتوں کی نیت پر سوال پیدا ہوتے ہیں۔