نئی دہلی: کانگریس کے سینئر لیڈر اور لوک سبھا میں قائد حزب اختلاف راہل گاندھی نے مدھیہ پردیش سے راجیہ سبھا کے لیے کانگریس امیدوار میناکشی نٹراجن کی نامزدگی مسترد کیے جانے کے معاملے پر بی جے پی اور الیکشن کمیشن کو سخت تنقید کا نشانہ بنایا ہے۔ انہوں نے کہا کہ ملک میں پہلے ’ووٹ چوری‘ اور ’حکومت چوری‘ ہوئی اور اب ’سیٹ چوری‘ کا دور شروع ہو گیا ہے۔
سوشل میڈیا پر جاری ایک بیان میں راہل گاندھی نے کہا کہ بی جے پی اور الیکشن کمیشن کی ’جگل بندی‘ نے مقابلہ شروع ہونے سے پہلے ہی ختم کر دیا۔ انہوں نے کہا کہ میناکشی نٹراجن نے اپنی نامزدگی کے ساتھ تمام ضروری دستاویزات جمع کرائی تھیں اور ان کے خلاف کوئی زیر التوا مقدمہ بھی نہیں تھا لیکن اس کے باوجود بی جے پی کی جانب سے اٹھائے گئے ایک اعتراض کی بنیاد پر ان کی نامزدگی منسوخ کر دی گئی۔