اسلام آباد: وفاقی تحقیقاتی ادارے (ایف آئی اے) کے اینٹی کرپشن سرکل اسلام آباد زون نے گردوں کی غیر قانونی پیوند کاری اور انسانی اعضاء کی اسمگلنگ میں ملوث ہونے کے الزام میں معروف یورولوجسٹ اور نجی اسپتال کے ملازم سمیت 9 افراد کو گرفتار کرلیا۔
ایف آئی اے حکام کے مطابق گرفتاریاں اسلام آباد کے ایک معروف نجی اسپتال پر چھاپے کے دوران کی گئیں جہاں مبینہ طور پر گردے نکالنے کے غیر قانونی آپریشن کیے گئے۔
ڈاکٹر اور ہسپتال کے ملازم کو نیٹ ورک کے کلیدی آپریٹو کے طور پر بیان کیا جاتا ہے۔
یہ کارروائی وزیر داخلہ محسن نقوی، ایف آئی اے کے ڈائریکٹر جنرل عثمان انور اور ڈائریکٹر اسلام آباد زون سید شہزاد ندیم بخاری کی ہدایت پر کی گئی۔
مبینہ عطیہ دہندگان، وصول کنندگان اور اسپتال کے عملے سمیت جائے وقوعہ پر موجود کئی دیگر افراد کو بھی پوچھ گچھ کے لیے حراست میں لے کر ایف آئی اے کے دفتر منتقل کر دیا گیا۔
حکام نے بتایا کہ کریک ڈاؤن جنوبی پنجاب کے پسماندہ اضلاع بالخصوص رحیم یار خان اور ڈیرہ غازی خان کے غریب لوگوں کو نشانہ بنانے والے وسیع نیٹ ورک کی جاری تحقیقات کا حصہ تھا۔
ملزمان نے مبینہ طور پر مالی طور پر پسے ہوئے لوگوں کو اعضاء مہنگے داموں فروخت کرنے سے پہلے معمولی رقم کے عوض ان کے گردے فروخت کرنے کا لالچ دیا۔
ایف آئی اے کا کہنا ہے کہ تفتیش کا دائرہ وسیع کیا گیا اور نیٹ ورک کے دیگر ارکان کی گرفتاری کے لیے اضافی چھاپے مارے گئے۔
0 Comments